دنية بنت
Tuesday, February 12, 2008
دقة روح
كنت دايما بقول محدش يستاهل ..
محدش يستاهل إني اخد ذنوب عشانه.. فبطلت أتكلم على حد
محدش يستاهل إني اخد ذنوب على حد يشوف شعري .. فاتحجبت
محدش يستاهل إني أحبه عشان أنا لما أحب بحب بجد .. فبطلت أحب
محدش يستاهل إنه يبقى صديقي .. عشان صاحبت بنات كتير ولما نجحت وربنا باركلي محدش فيهم سأل .. لاء وفضلوا يتكلموا من ورايا وبيكلموني عادي ولا كأنهم عاملين حاجة ..
حاجات كتيره أفقدتني مشاعر حلوة بحبها ..
بني ادم يبدأ بكلمه معايا .. ماكونش مقتنعة بس أقتنع عشان حاطه صورة متوقعاها حقيقية وممكن تتحقق ..
وفي الاخر ماتتحققش ..
أملي في ربنا كبير أوي..
أوي .. أوي ..
قد أوقات شروق الشمس من أول ما اتخلقت
وقد طول ليالي الشتا والصيف أول ماتكونوا ..
بس الناس دي .. بجد غريبة
كل ما افتكر اني فهمت حد ولقيته كويس قوي
الاقي حاجه تبعدني عنه .. حاجة ماكنتش شايفاها قبل كده
مش عشان الحب أعمى
بس عشان الناس بتتغير
صحابي اللي كانوا صحابي
حتى شوية من أهلي
يمكن ناس هتقولي يبقى العيب ممكن يكون فيكي إنتي
بفكر كتير وأكتب اللي أنا بعمله .. وأكتب في بالي اللي هما بيعملوه
مش قادره أتخيل الناس دي .. عارفه إن الحاجة اللي بيعملوها غلط .. بس برضه بيعملوها
وبتبقى نيتهم بجد وحشة
وبتبقى نيتهم بجد وحشة
ازاي الكائنات دي نقدر نسميها بني ادمين ؟
بتتحكم فيهم عادات وتقاليد غلط .. وهما متمسكين بيها أكتر من دينهم
بيقولولك لاء عيييييب .. بس مافيش لاء حررررام لما واحد ينم على التاني
عيبنا فينا .. والله
هل أنا لسه غلط ؟
طب أنا كل ذنبي إني أتمنيت معاملة حلوة
عشان بيبقى نفسي أخدهم جوا روحي
أخبيهم وأخلي الباب مفتوح من بره للي عايز يجي
ومقفول من جوه عشان مايخروجوش
بس حتى اللي بيجي .. بدور عليه مش بالاقيه
سامعه صوته بيقولي أنا هنا
بس هوا .. مش هنا
posted by Bint at 2:00 AM
6 Comments:
هي الدنيا كده!! بس كلنا لينا اخطائنا المهم نسامح و نواجه في احيان كتيير.. المواجهه بتحل مشاكل كتير صدقيني..
http://3ala-do2-elqamar.blogspot.com
حبيبتي يا هاجر ..
أنا مش بعرف أواجه أعمل إيه طيب ؟
بجد بخاف .. مش من الناس بس من إني أجرح نفسي
:)
أنا فيا كتير منك على فكرة ... قريت شوية في البلوج بتاعك .. حسيت إني أنا اللي بتكلم
خايفه من انك تجرحي نفسك..
دي بجد بقى انا :)
بس خوفنا ده بيضيع مننا حاجات كتير و فرص كتير، لازم نحاول نخلص من الخوف ده.
لازم مش كده ؟ :)
بس تفتكري دا سهل ؟
عارفة بجد ببقى نفسي ساعات أبقى زي بنات تانية ..اللي مش بيهمها ..بس برضه مش بعرف .. يمكن لأن جوايا مش عايز أصلا يبقى زيهم
:)
:) يبقى خليكي اكتبي
هي دي الحاجه اللي بتشيل الهم عننا بجد
ممكن فيه ناس كتيره غلط
وفعلا ماتستاهلش
لكن احنا نستاهل نحب
ونشوف دنيتنا حلوة
مش كل حاجه لابيض .......لاسود
فيه كمان رمادي!
Post a Comment
<< Home