دنية بنت

Sunday, February 17, 2008

صدفة Click

بالصدفة جات
بجد صدفة
يعني إيه صدفة أصلاً
عرفت يمكن إن مش أي حد بيقول أي حاجة
وإن اللي إحنا فاكرينه عن الناس ..
أو خليني أقول
الكلام اللي ناس بتقوله مش لازم يكون موجود من أصله جواهم
وإن الكلام اللي مش موجود قدمنا .. بيحصل من ورانا وهوا بجد موجود
وكله دا بيحصل صدفة ..
وفيني أنا
:)
عادي .. بجد .. عادي
posted by Bint at 12:15 PM 3 comments

Tuesday, February 12, 2008

دقة روح

كنت دايما بقول محدش يستاهل ..
محدش يستاهل إني اخد ذنوب عشانه.. فبطلت أتكلم على حد
محدش يستاهل إني اخد ذنوب على حد يشوف شعري .. فاتحجبت
محدش يستاهل إني أحبه عشان أنا لما أحب بحب بجد .. فبطلت أحب
محدش يستاهل إنه يبقى صديقي .. عشان صاحبت بنات كتير ولما نجحت وربنا باركلي محدش فيهم سأل .. لاء وفضلوا يتكلموا من ورايا وبيكلموني عادي ولا كأنهم عاملين حاجة ..
حاجات كتيره أفقدتني مشاعر حلوة بحبها ..
بني ادم يبدأ بكلمه معايا .. ماكونش مقتنعة بس أقتنع عشان حاطه صورة متوقعاها حقيقية وممكن تتحقق ..
وفي الاخر ماتتحققش ..
أملي في ربنا كبير أوي..
أوي .. أوي ..
قد أوقات شروق الشمس من أول ما اتخلقت
وقد طول ليالي الشتا والصيف أول ماتكونوا ..
بس الناس دي .. بجد غريبة
كل ما افتكر اني فهمت حد ولقيته كويس قوي
الاقي حاجه تبعدني عنه .. حاجة ماكنتش شايفاها قبل كده
مش عشان الحب أعمى
بس عشان الناس بتتغير
صحابي اللي كانوا صحابي
حتى شوية من أهلي
يمكن ناس هتقولي يبقى العيب ممكن يكون فيكي إنتي
بفكر كتير وأكتب اللي أنا بعمله .. وأكتب في بالي اللي هما بيعملوه
مش قادره أتخيل الناس دي .. عارفه إن الحاجة اللي بيعملوها غلط .. بس برضه بيعملوها
وبتبقى نيتهم بجد وحشة
ازاي الكائنات دي نقدر نسميها بني ادمين ؟
بتتحكم فيهم عادات وتقاليد غلط .. وهما متمسكين بيها أكتر من دينهم
بيقولولك لاء عيييييب .. بس مافيش لاء حررررام لما واحد ينم على التاني
عيبنا فينا .. والله
هل أنا لسه غلط ؟
طب أنا كل ذنبي إني أتمنيت معاملة حلوة
عشان بيبقى نفسي أخدهم جوا روحي
أخبيهم وأخلي الباب مفتوح من بره للي عايز يجي
ومقفول من جوه عشان مايخروجوش
بس حتى اللي بيجي .. بدور عليه مش بالاقيه
سامعه صوته بيقولي أنا هنا
بس هوا .. مش هنا
posted by Bint at 2:00 AM 6 comments

Wednesday, February 6, 2008

دنيتي

بتمشى بين المدونات وعماله أفكر في مدونتي القديمة .. بلاقي فيها تعليق كل فين وفين .. وبحسد الناس التانية اللي عندها أكتر من 3 تعليقات
قعدت أفكر إيه السبب في كده .. واكتشفت إني عايشه في دنيتي.. مافهاش حد غيري.. ولو حد خبط على شباكي بجري عشان أفتحه من غير مابص منه .. مش عشان شباكي قزاز لاء .. عشان بحب الناس ..
كنت بقرأ أفكار ناس كتيره .. بتعكسلي شخصيتهم .. بس ..
وعرفت برضه إن المدونة اللي بتبقى بالعربي .. أقربلي ..
المدونة دي عملتها عشان أكتب براحتي بالعربي .. وعلشان أكتب أسراري هنا .. علشان التانية ناس صحابي عرفني .. بس مش عايزاهم يعرفوا المرة دي إن دي أنا اللي هنا .. فاكتبلهم براحتي حتى لو مش بيقروا دي
:) يعني إيه عايشه في دنيتك ؟
يعني مخ بيفكر في أرواح الناس اللي حواليه .. بيفكروا زيي ؟؟؟ لاء يعني روحهم كده بتكلمهم إزاي في الوقت دا والثانية دي ؟؟ هل مكان قلبهم زي مكان قلبي ؟؟ أنا قلبي بحسه في قلبهم .. هما بيحسوا بإيه أو إزاي ؟ نفسي أرواحنا تتكلم بدل مانسمع أصواتنا .. عشان أنا روحي مخبية كتير .. وبتقول حاجات كتير .. مختلف عن اللي بقولوا .. عشان بخاف اللي قدامي يفهمني غلط أو يقول مالها دي ومال الكلام اللي أنا بقولوا ..
المكان ده لقيته حنين كده عليا .. محدش عارفني .. بس اللي يعرف روحك يقدرك .. واللي يعرف شكلك بس وكلامك دا بس يعرفك ..
تحياتي
:)
posted by Bint at 5:02 AM 5 comments